AN AVEL EN HO PLEV

Gwened : kaer an hañv, tomm an heol ha birvilh er vro gant an douristed deuet da vakañsin...
Biskoazh c'hoazh ! Pemp korf divouzellet a zo bet kavet e porzh-mor Gwened. Ha setu krog ar chare da vat : ensellerien, archerien, kazetennourien a zo war an tach evit diluziañ an afer ar buanañ ar gwellañ.
Gwall nec'het ar polis pa ne gavont ket penn d'an afer. Daoust e vije ar mafia japanat oc'h aozañ un trafik opium er vro ?
Stal ficherezh-vlev Kristina ha Loeiza "An avel en ho plev" a seblant desachañ ur bern tud evel ma ra ur maen-touch.
Klask a ra lod tud diheñchañ an enklask hag itrikoù ur bern a rankont ijinañ evit ma ne vo ket diskuliet ar wirionez.